ಗದಗ : ಮೂರು ದಿನದ ಹಿಂದೆ ಕಾಣೆಯಾದ ಮಹಿಳೆ ಬಾವಿಯಲ್ಲಿ ಪ್ರತ್ಯಕ್ಷ.

ಗದಗ : ಮೂರು ದಿನದ ಹಿಂದೆ ಕಾಣೆಯಾದ ಮಹಿಳೆ ಬಾವಿಯಲ್ಲಿ ಪ್ರತ್ಯಕ್ಷ.

ಮೂರು ದಿನ ಬಾವಿಯಲ್ಲಿದ್ದ ಮಹಿಳೆ ; ಬದುಕಿದ್ದೇ ಪವಾಡ. ತೋಟಗಂಟಿ ಗ್ರಾಮದಲ್ಲೊಂದು ವಿಚಿತ್ರ ಘಟನೆ

ಗದಗ : ಸತ್ಯಮಿಥ್ಯ ( ಅಗಸ್ಟ್ -30).

ಜಿಲ್ಲೆಯ ನರೇಗಲ್ ಹೋಬಳಿ ಸಮೀಪದ ತೋಟಗಂಟಿ ಗ್ರಾಮದಲ್ಲಿ ಕಾಣೆಯಾಗಿದ್ದ ವಿವಾಹಿತ ಮಹಿಳೆ ಅದೇ ಗ್ರಾಮದ ಹೊಲವೊಂದರಲ್ಲಿ ಇರುವ ಹಳೇ ಬಾವಿಯಲ್ಲಿ ಮೂರು ದಿನಗಳ ನಂತರ ಪ್ರತ್ಯಕ್ಷವಾದ ಘಟನೆ ಈಚೆಗೆ ನಡೆದಿದೆ.

ಸ್ಥಳೀಯರು ಆಕೆಯನ್ನು ರಕ್ಷಿಸಿ ಮಹಿಳೆಯನ್ನು ಗದಗ ಜಿಲ್ಲಾಸ್ಪತ್ರೆಯಲ್ಲಿ ಚಿಕಿತ್ಸೆ ಕೊಡಿಸುತ್ತಿದ್ದಾರೆ.

ತೋಟಗಂಟಿ ಗ್ರಾಮದಿಂದ ಕೋಚಲಾಪುರಕ್ಕೆ ಹೋಗುವ ಮಾರ್ಗದಲ್ಲಿರುವ ಮನೆಯಲ್ಲಿ ವಾಸವಿರುವ ಪಾರ್ವತಿ ವೀರಯ್ಯ ಕಲ್ಮಠ ಎನ್ನುವ ದಂಪತಿಗಳಿಗೆ ಆರು ತಿಂಗಳ ಹಿಂದಷ್ಟೇ ಮದುವೆಯಾಗಿದೆ. ಆಗಸ್ಟ್‌ 20 ರಂದು ಎಂದಿನಂತೆ ಬೆಳಿಗ್ಗೆ 5 ಗಂಟೆಗೆ ಬೇಗ ಎದ್ದ ಮಹಿಳೆ ಬೆಳಗಾದರು ಎಲ್ಲಿಯೂ ಕಾಣದೇ ಇರುವ ಕಾರಣ ಗಂಡ ಹಾಗೂ ಕುಟುಂಬಸ್ಥರು ಎಲ್ಲೆಡೆ ಹುಡುಕಿದ್ದಾರೆ. ಎಲ್ಲಿಯೂ ಸಿಗದೆ ಇದ್ದಾಗ ನರೇಗಲ್‌ ಪೊಲೀಸ್‌ ಠಾಣೆಯಲ್ಲಿ ಕಾಣೆಯಾಗಿರುವ ಕುರಿತು ದೂರು ನೀಡಿದ್ದಾರೆ. ಆದರೆ ಆಗಸ್ಟ್-22 ರಂದು ಗ್ರಾಮದ ಸಮೀಪದ ಅಂದಾಜು 1ಕಿಮೀ ದೂರದ ಬಾವಿಯಲ್ಲಿ ಮಹಿಳೆಯೊಬ್ಬರು ಅರಚುತ್ತಿರುವುದು ಹೊಲದಲ್ಲಿ ಕೆಲಸ ಮಾಡುತ್ತಿದ್ದ ಕೃಷಿಕರಿಗೆ ಕೇಳಿಸಿದೆ. ಆಗ ಗ್ರಾಮಸ್ಥರಿಗೆ, ಕುಟುಂಬಸ್ಥರಿಗೆ ಹಾಗೂ ಪೊಲೀಸ್‌ ಠಾಣೆಗೆ ಮಾಹಿತಿ ನೀಡಿ ನಂತರ ಹಗ್ಗದ ಸಹಾಯದಿಂದ ರಕ್ಷಣೆ ಮಾಡಿದ್ದಾರೆ. ಹೊಲದಲ್ಲಿರುವ ಬಾವಿಯ ಸುತ್ತಲೂ ಹಾಗೂ ಬಾವಿಯಲ್ಲಿಯೂ ಅಪಾರ ಪ್ರಮಾಣದಲ್ಲಿ ಗಿಡಗಳು ಬೆಳೆದಿವೆ. ಅದರಲ್ಲಿ ಹೇಗೆ ಬಿದ್ದಳು ಎನ್ನುವುದು ತಿಳಿಯದ ವಿಚಿತ್ರ ಘಟನೆಯಾಗಿದೆ.

ಆ.20 ರಂದು ಬೆಳಿಗ್ಗೆ ನಸುಕಿನ ಜಾವ ಮನೆಯ ಮುಂದೆ ನಿಂತಿರುವಾಗ ಕೋಚಲಾಪುರ ಮಾರ್ಗದಿಂದ ಸೀರೆಯುಟ್ಟುಕೊಂಡು ಬಂದ ವಯಸ್ಕ ಮಹಿಳೆಯೊಬ್ಬರು ನನ್ನ ಕುತ್ತಿಗೆ ಭಾಗಕ್ಕೆ ಹಿಡಿದು ಮನೆ ಬಿಟ್ಟು ಬರುವಂತೆ ಬಲವಂತ ಮಾಡಿದರು. ಕೈಬಳೆ, ಕಾಲುಂಗರ ನೀಡುವಂತೆ ಒತ್ತಾಯ ಮಾಡಿದರು. ಕಣ್ಣು ಕಾಣದಂತೆ ಮರೆ ಮಾಡಿ ಕುತ್ತಿಗೆ ಹಿಡಿದು ಭಯಪಡಿಸಿ ಗೋವಿನ ಜೋಳದ ಹೊಲದ ಮೂಲಕ ನನ್ನನ್ನು ಎಳೆದುಕೊಂಡು ಬಂದರು ನಂತರ ತಾಳಿ ಕೊಡುವಂತೆ ಬಲವಂತ ಮಾಡಿದರು ಹಾಗೂ ನನ್ನನ್ನು ಬಾವಿಗೆ ತಳ್ಳಿದರು. ಬಾವಿಗೆ ಬಿದ್ದ ಮಾರನೆ ದಿನ ನನಗೆ ಪ್ರಜ್ಞೆ ಬಂದಿದೆ. ಆಗ ಕಿರುಚಿದರು ಸಹಾಯಕ್ಕೆ ಯಾರು ಬರಲಿಲ್ಲ. ಆ. 22 ರಂದು ಧ್ವನಿ ಕೇಳಿದ ಜನರು ನನ್ನ ಕಾಪಾಡಿದ್ದಾರೆ. ಆದರೆ ಯಾರು ನನಗೆ ಎಳೆದುಕೊಂಡು ಹೋದರು ಎನ್ನುವ ನಿಖರ ಮಾಹಿತಿ ನನಗೆ ಗೊತ್ತಿಲ್ಲ ಎಂದು ತೊಂದರೆಗೆ ಒಳಗಾದ ಮಹಿಳೆ ಮಾಹಿತಿ ನೀಡಿದರು.

ಗ್ರಾಮಸ್ಥರು ಬಾವಿಯಲ್ಲಿ ಇಳಿದು ಊಟ ನೀಡಿ ಉಪಚರಿಸುವಾಗ ಮಹಿಳೆಯ ಕೊರಳಲ್ಲಿ ತಾಳಿ ಇರಲಿಲ್ಲ ಅದು ಬಾವಿಯ ಮೇಲ್ಭಾಗದಲ್ಲಿತ್ತು ಹಾಗೂ ಒಂದು ಕಾಲುಂಗುರ ಮಾತ್ರ ಕಾಲಲ್ಲಿತ್ತು ಎಂದು ಹೇಳುತ್ತಿರುವ ಮಹಿಳೆಯ ವಿಡಿಯೋ ಹರಿದಾಡುತ್ತಿದೆ.

ಕಾಣೆಯಾದ ನಂತರ ಹೊಲ, ಮನಿ, ಊರೂರು ಹುಡುಕಿದೇವು ಆದರೆ ಎಲ್ಲಿಯೂ ಸಿಗಲಿಲ್ಲ. ಆದ್ದರಿಂದ ಪೊಲೀಸ್‌ ಠಾಣೆಗೆ ದೂರು ನೀಡಿದ್ದೇವೆ. ಬಾವಿಯಲ್ಲಿರುವ ಕುರಿತು ಗೊತ್ತಾದ ನಂತರ ಜನರ ಸಹಾಯದಿಂದ ರಕ್ಷಣೆ ಪಡೆದು ಗದಗ ಜಿಲ್ಲಾಸ್ಪತ್ರೆಯಲ್ಲಿ ಚಿಕಿತ್ಸೆ ಕೊಡಿಸುತ್ತಿದ್ದೇವೆ ಎಂದು ಮಹಿಳೆಯ ಪತಿ ವೀರಯ್ಯ ಮಾಹಿತಿ ನೀಡಿದರು.

ಈ ಕುರಿತು ನಮ್ಮಲ್ಲಿ ಪ್ರಕರಣ ದಾಖಲಾಗಿಲ್ಲ ಆದರೆ ಎಂ.ಎಲ್.ಸಿ ಆಗಿದೆ. ಮಹಿಳೆಯನ್ನು ಬಾವಿಯಿಂದ ಹೊರಗೆ ತೆಗೆದಾಗ ಸ್ಥಳೀಯ ಆಸ್ಪತ್ರೆಯಲ್ಲಿ ಚಿಕಿತ್ಸೆ ನೀಡಿ ಗದಗ ಕರೆದುಕೊಂಡು ಹೋಗಿದ್ದಾರೆ. ಸ್ಟೇಷನ್‌ನಿಂದ ಗದಗ ಹೋಗಿ ಮಾಹಿತಿ ಪಡೆದುಕೊಂಡು ಬಂದಿದೆ. ಆದರೆ ಮಹಿಳೆಗೆ ಗಾಳಿಶಕ ಇತ್ತು, ಅಮವಾಸೆ, ಹುಣ್ಣಿಮೆಗೆ ಆಗಾಗ ಹೀಗೆ ಆಗುತಿತ್ತು ಎಂದು ಕುಟುಂಬಸ್ಥರು ಹೇಳುತ್ತಿದ್ದಾರೆ. ಹೆಚ್ಚಿನ ಮಾಹಿತಿಯನ್ನು ತನಿಖೆ ಮಾಡಿ ಸಂಗ್ರಹಿಸಲಾಗುವುದು ಎಂದು ನರೇಗಲ್‌ ಪೊಲೀಸ್‌ ಸ್ಟೇಷನ್ ಪಿಎಸ್‌ಐ ಐಶ್ವರ್ಯ ನಾಗರಾಳ ಹೇಳಿದರು.

ವರದಿ : ಸುರೇಶ ಬಂಡಾರಿ.